Сергей Фёдорович Ахромеев чачсь цвети ковонь ветеце чистэ тёжа вейксэсядт комсь колмоце иестэ кезэрень покш Виндрей велесэ, неень шкань Торбеевской районсо, сокицянь – видицянь семиясо.Тетязо комсеце иетнестэ ульнесь раскулаченной, тусь ве ёнов важодеме ды ёмась. Авазо лиядсь ськамонзо кавто эйкакш марто, тусь Виндряй велестэ Московов эсь сазоронзо пелев. Виндряй велесэнть эрясть мирдензэ ялаксонзо: вейкесь эйстэст ульнесь лесничеекс, омбоцесь врачокс, колмоцесь учителекс, ансяк авазо эзь кармак сыненст пшкалеме мекс бути. Тёжа вейксэсядт колоньгемень кавтоце иестэ Сергей совась школав. Тонавтнесь мелень путозь, пек вечксь история, философия, литература. Уже Ине Отечественной войнадо мельга Сергей Фёдоровичень учительницазо кази тензэ фотокарточка истямо сёрмадовкс марто «Тонавтницянтень, конась икельдизе тонавтыцянть». Школасо Сергей совась комсомолс, кармась комсомолонь комитетэнь секретарекс, учкомонь членэкс. Школань прядомадо мейле сон арсесь поступамс тонавтнеме институтов филологокс, философокс или же историкекс, но теевсь овсе а истя. Покш патязо лись мирденень, авазо тусь эрямо сонзэ ёнов. Ульнесь ли кемготово иесэ цёрыненть мелезэ кармамс морской офицерэкс? Сонзо овсе арасель мелезэ кармамс морской офицерэкс!
Но эсь квартираст сынст арасель, свал ярмак лангс эрясть ломань кедьсэ, секс Сергейнень савсь комсомолонь путёвкань коряс туемс тонавтнеме Военно-морской спецшколав, тосо андсть, оршасть студентнэнь государствась, максть тенст эрямо тарка. Тёжа вейксэсядт ниленьгемень васенце иестэ аштем ковонь комсь кавтовоце чистэ устававсь Ине Отечественной войнась, Сергей тонавтниль уш Михаил Васильевич Фрунзень лемсэ морской училищасо, прядызе васень курсонть. Васенце ды омбоце курсонь студентнэнь эстэ пурныть особой назначениянь отряд, конань направизь Таллин ошонтень эрявикс объектнэнь ванстомо. Медь ковсто Сергей Фёдорович Ленинградской фронтсо, вансты Октябрьской революциянь лавсенть - Ленинград ошонть. Ацам ковсто Ахромеев понги госпиталев, уже блокадасо Ленинград ошос. Ацам ковонть прядомсто тёжа вейксэсядт ниленьгемень васенце иестэ сась истямо распоряжения: военно-морской училищань курсантнэнь эвакуировамс Астрахань ошов. Блокадасо Ленинград ошостонть ютасть ялга - Эрямонть киява, те кияванть куродозь ошонтень усксть ярсамопель, медикамент, боеприпаст, сонзэ эзга ошостонть эвакуировасть ошонь эрицятнень. Те кияванть Ленинград ошстонть госпитальстэ ютасть ялга ды усксть истят ранявозь кемгавксо иесэ цёракайтнень. Вийтеме кадовозь Ахромеевень кельмевтизь пильгензэ, устававсь гангрена. Кавонест пильгензэ решазель керямс. Оймезэ истякак а содат мень вийсэ кирдевсь? А тесэ ещё те операциясь. Сергей эсь прянзо эрицякс уже эзь лово. Сюкпря се докторонтень, сон ульнесь дворянской раськень эйстэ, бывшейтнеде, кармась лецямо эйсэнзэ эсь способсо. Ды лецизе! И пильгензэ идинзе, и эрямонзо ды курямодояк кардызе. Мейле сонзо ещё кавто ковт лецясть дистрофиядо. Тёжа вейксэсядт ниленьгемень кавтоце иень прядомс сон велявты фронтов. Флотсо служамо Ахромеевень эзизь сае шумбрачинзэ коряс, савсь тензэ тонавтнемс военной училищасо ды Сталинградской фронтов сон сась лейтенантонь званиясо, аравтызь стрелковой полконь командирэкс. Мейле воевась Украинской ды Южной фронтнэсэ. Олякстомсь немецтнень эйстэ Румыниянть. Ине Отечественной войнанть прядызе капитанонь званиясо. Тонавтнесь бронетанковой войскань самоходной артиллериянь высшей офицерской школасо. Рядовой офицерстэ кайсь Советской Союзонь Маршалокс. Войнадо мельга сон кандсь служба Главной управлениянь начальникекс, Генеральной штабонь начальникень заместителекс, Генеральньй штабонь начальникень васенце заместителекс, Генеральной штабонь начальникекс, Советской Союзонь оборонань министрань васенце заместителекс ды президентэнть советникекс. Тёжа вейксэсядт кавксоньгемень омбоце иестэ Сергей Фёдорович Ахромеевень казизь Советской Союзоь Героень лемсэ Афганистанонть кис. Эрьва солдатонть ды офицерэнь ульнесь эсь Афганистанозо ды эсензэ кизэ те войнантень, конась ютась вейксэ иеде ламо. Сергей Фёдорович мольсь каршо, штобу ветямс Афганистанов минек Советской Союзонь ушмотнень ограниченной контингент. Сон ульнесь Афганистансо минек войскатнень оперативной группань штабонь начальникекс. Тёжа вейксэсядт кавксоньгемень колмоце иестэ Ахромеевень казизь Маршалонь лемсэ. Сергей Фёдорович туи эрямостонть тёжа вейксэсядт вейксэньгемень васенце иестэ, зярдо калады минек Советской Союзось.
Соединённой Штатонь экс президентэсь Джордж Буш истя ледстнесть Сергей Фёдорович ланга: «Кода президент, монь ульнесь а стувтовикс вастовомам Ахромеев маршалонть марто. Сонензэ эсть вечкевть нярыя полавтовкснэ эсь масторсонть, конатнень сон нейсь. Мон ванынь лангозонзо вейке вастомастоманть перть ды арсинь, вот ашти монь икеле ломань, конась якшамо войнань ламо иень перть ашти минек ёндо лия ёно. Вот мон аштян те ломаненть марто, конась эсь масторсонзо покш военной чиновник, мон марян сонензэ ансяк ломанькс путома чи. Мись? Секс, што эрьва сонзо лексемасонзо мон маринь эсь масторонтень покш вечкема, анокчи эсь чачома масторонь икеле долгонть топавтомантень. Сон ульнесь коммунистэкс, явсь минек эйстэ эсь вановтонзо коряс. Но сон ульнесь военной ломань, почет марто служась эсь масторонтень. Весе те и тейсь монь лангс пек покш мельс аравкс.»
Материал подготовила: Т. В. Чиндяйкина - н. сотрудник отдела
научно-просветительской работы ММВиТП 1941-1945 гг.
